O Salón do Automóbil Ourensemotor 2011, en Expourense

Presentouse o Salón do Automóbil “Ourensemotor 2011” que se celebra do 3 ao 5 de xuño no recinto feiral ourensán contando coa participación do 90% dos concesionarios da provincia que presentarán os últimos modelos de 29 marcas de vehículos que ocuparán máis de 10.000 metros cadrados de exposición. Trátase dunha iniciativa da empresa Organización Feiral Galega que elixiu as instalacións de Expourense para organizar en Ourense, logo de cinco anos sen celebrar ningún, un salón específico sobre o automóbil. Esta presentación correu a cargo do xerente desta empresa, Sindo Alonso, quen estivo acompñado polo director xerente de Expourense, Alejandro Rubín.

As marcas presentes son: Seat, Audi, Volkswagen, Hyundai, Skoda, Volvo, Saab, Porsche, Ferrari, Maserati, Mitsubishi, Suzuki, Honda, Mercedes, Toyota, Dacia, Renault, Nissan, Subaru, Isuzu, BMW, Kia, Fiat, Alfa Romeo, Sang-yong, Mazda, Rieju e Peugeot Motorcycles. Ademais das marcas de condución sen carnet Grecav e JDM.

Entre as novidades que se van presentar destacan os modelos híbridos e o novo Mercedes Clase C, que será unha primicia na provincia. Ademais, os concesionarios ofrecerán a posibilidade de probar determinados modelos que estarán ubicados á saída do recinto feiral. O espazo comercial complementarase cun área expositiva de 25 motos antigas, coches clásicos e de coches equipados para rallies de terra.

O horario de apertura do salón será o venres 3, sábado 4 e domingo 5 de xuño, de 11.00 a 21.00 horas de xeito ininterrumpido. A entrada terá un custo de 3 euros.

Ourensemotor ocasión

A cita desta fin de semana complementarase co salón Ourensemotor Ocasión que terá lugar, tamén en Expourense, a fin de semana do 11, 12 e 13 de xuño, e na que as mesmas empresas expositoras ofrecerán vehículos seminovos, km. 0 ou de xerencia.

A organización está estudando a viabilidade de sortear, entre os visitantes aos dous salóns (novo e ocasión), un vale con valor de 6.000 euros para mercar un vehículo de ocasión a elixir entre todas as marcas expositoras.

O horario de apertura deste segundo salón será o mesmo: de 11.00 a 21.00 horas.

Mes do Motor en Expourense
Xuño será o “Mes do Motor” en Expourense. Logo destas dúas fins de semana do salón do automóbil, as instalacións do recinto acollerán, entre o 15 e o 18 de xuño, o 44º Rallye de Ourense. Trátase dun mes de intensa actividade xa que ademais Expourense é o lugar elixido para a celebración do festival Derrame Rock, entre os días 23 e 25.