María Kodama, a viúva de Jorge Luis Borges, no ciclo Galicia ceo das letras

O ciclo “Galicia, ceo das letas” remata o sábado 25 de xuño cunha convidada de luxo: María Kodama, a viúva e derradeira musa de Jorge Luis Borges, que visitará a Cidade da Cultura de Galicia para participar na sesión adicada ao escritor arxentino, que se celebra precisamente cando se cumpren os 25 anos do súa morte.

Con motivo desta sesión, que estará presidida polo conselleiro de Cultura e Turismo, Roberto Varela, inaugurarase na Biblioteca de Galicia a mostra “Un percorrido polo universo borgeano”, que recolle correspondencia persoal, primeiras edicións, libros adicados polo autor, artigos en revistas ou xornais e retratos tomados por coñecidos fotógrafos. material que permitirá aos visitantes achegarse ao fascinante mundo deste autor. A exposición, que poderá visitarse ata o 24 de xullo, está patrocinada pola Fundación Internacional Jorge Luis Borges en colaboración co Centro de Arte Moderno.

Claudio Rodríguez Fer, poeta, ensaísta e autor do libro “Borges no labirinto galego”, será o encargado de presentar unha sesión na que María Kodama fará un percorrido polo mundo interior e universo literario do autor de “El Aleph”. A sesión rematará cun concerto de Mónica Monasterio e Horacio Lovecchio, intérpretes arxentinos de música tradicional e contemporánea xudeo-española, que prestan especial atención á poesía.

Co homenaxe a Borges remata un ciclo que comezou en xaneiro, poucos días despois da inauguración da Biblioteca e do Arquivo por parte dos Príncipes de Asturias. Dous sábados ao mes, o “Galicia, ceo das letras” homenaxeou a algúns dos máis grandes das letras galegas, como Rosalía de Castro, Manuel Antonio, Cela, Martín Codax, Valle-Inclán, Cunqueiro, Valente, Torrente Ballester ou Blanco Amor. Xunta a eles, houbo tamén un espazo para autores de “literaturas veciñas”, como Pessoa ou Salvador Espriu.

Coa súa vocación de unir Literatura e outras artes, polo Auditorio da Biblioteca de Galicia pasaron non só escritores, poetas, ensaístas e historiadores, senón tamén músicos, actores ou cómicos, nomes como Uxía Senlle, Joao Afonso, Marina Rosell, o grupo de música antiga Martín Codax, os actores Charo López, José Luis Gómez, Cándido Pazó ou Quico Cadaval.