1.250 nenos ourensáns participan en “Contacontos”, que motiva á lectura por medio da ilustración e a oralidade

A actividade, da que foron partícipes un total de 1.250 alumnos de Educación Primaria da Cidade, rematou hoxe a súa edición 2011-2012, cun acto de clausura no CEIP Manuel Sueiro, ó que asistiu a Concelleira de Educación, Ana Garrido, e na que participaron 20 alumnos de Primaria do propio centro.

A principal novidade da edición deste ano foi a posibilidade por parte dos cativos de escoller a versión dos contacontos, tanto en galego, como en castelán ou en inglés. Deste xeito, preténdese motivar á lectura por medio da ilustración e a oralidade, á vez que se fomenta a aprendizaxe dos propios idiomas.

Na actividade participaron profesores da Escola Municipal de Artes Escénicas, que fixeron partícipes ós nenos para que pasen de ser meros espectadores, a xogar un papel activo na función. O tema globalizador do programa de Animación á Lectura, na que se enmarca a actividade, son este curso os ríos, as termas e as fontes da nosa cidade.