Esther Ferrer presenta "En catro movementos" no CGAC ata o 30 de setembro

O Centro Galego de Arte Contemporánea, dependente da Consellería de Cultura e Educación, acolle ata o vindeiro 30 de setembro, a exposición Esther Ferrer. En catro movementos, organizada por Acción Cultural Española (AC/E). O director do centro, Miguel von Hafe, presentou hoxe en rolda de prensa esta exposición, nun acto no que estivo acompañado pola artista Esther Ferrer, e pola comisaria da mostra, Rosa Olivares. Esta mesma tarde, ás 20 horas, o conselleiro de Cultura, Educación e Ordenación Universitaria, Xesús Vázquez Abad inaugurará oficialmente a mostra.

Esther Ferrer. En catro movementos non é unha exposición antolóxica nin unha retrospectiva da artista senón unha maneira de visualizar os conceptos esenciais que presidiron e presiden todo o traballo da guipuscoana: o tempo, o infinito, a repetición e a presenza. Deste xeito, a exposición constrúese en torno a eses catro conceptos, representados cada un deles mediante distintas obras de Esther Ferrer: pezas de carácter obxectual, instalacións realizadas na propia sala e performances.

A exposición está organizada polo CGAC e Acción Cultural Española (AC/E), en coprodución co Centro-Museo Vasco de Arte Contemporáneo (ARTIUM) e o Museu d´Art Modern i Contemporani de Palma (ES BALUARD). Asemade, editouse un catálogo con textos de David Pérez, Tom Johnson, Sergio Rubira, Alberto Sánchez Balmisa, Margarita de Aizpuru e Rosa Olivares.

O tempo, o infinito, a repetición e a presenza, presiden a mostra
A través das súas series de fotografía máis coñecidas, Autorretrato no tempo e Autorretrato no espazo, Esther Ferrer fai fincapé no concepto de “tempo”, xunto coa instalación O fío do tempo, partituras e documentación dalgunhas das súas performances: as dúas partes de Ao ritmo do tempo, Dar tempo ao tempo, A primeira media hora e O tempo da performance.

O espazo dedicado ao “infinito” contén a instalación e a partitura de El muro de los inmortales, así como unha peza de audio titulada Los infinitos. O concepto, ademais, queda plasmado en dúas series de debuxos e lenzos tituladas Pi, e a proxección de Los decimales de Pi, que dan idea do interese da artista polo universo dos números.

No relativo á “repetición”, Esther realiza diversas variacións arredor da acción de Recorrer un cuadrado de todas las formas posibles. Unha instalación no espazo, debuxos sobre o muro e en papel cebola, e a documentación sobre a performance do mesmo título, forman parte desta sección.

Para o concepto “presenza”, conta con outra gran instalación que require da participación do espectador. En el marco del arte é unha peza que a artista realizou en 1999, cando representou a España na Bienal de Venecia, e que agora pode verse por primeira vez no noso país grazas a esta exposición. Xunto a ela, unha serie de marcos, por exemplo: La puerta sin puerta, En el marco del arte naturista o En el marco del arte moderno e En el marco del arte postmoderno, entre outras. O visitante tamén poderá contemplar a instalación En el marco de la historia del arte e a partitura e documentación videográfica da acción En el marco del arte.

Unha artista do efémero

Esther Ferrer, nacida en Donosti no ano 1937, é coñecida por empregar as performances como principal forma de expresión e exhibición en festivais de todo o mundo. Ao longo da súa traxectoria, orientou o seu traballo cara ás accións efémeras máis que cara a un tipo de produción artística permanente e, regularmente, expón o seu traballo plástico en en centros como o Museo Nacional Centro de Arte Reina Sofía de Madrid, a Galería Trinta de Santiago de Compostela ou a Staatsgalerie Stuttgart.

En 1999 foi unha dos dúas artistas que representaron a España na Bienal de Venecia e en 2008 concedéuselle o Premio Nacional de Artes Plásticas. En xuño deste ano, foi galardoada polo Goberno vasco co Premio Gure Artea 2012 en recoñecemento pola súa traxectoria artística.