A Xunta de Galicia destina 5 millóns de euros ao dique flotante de Ferrol

A Consellería de Economía e Industria destina no seus orzamentos unha partida de 5 millóns de euros para colaborar na construción do dique flotante co obxectivo de garantir a viabilidade de Navantia na área de reparacións. Esta partida orzamentaria pretende impulsar a mellora da competitividade do estaleiro e contribuir ao mantemento dos postos de traballo amosando de novo o firme compromiso do Goberno galego co naval de Ferrol.

Con este apoio financeiro a Xunta de Galicia dá o primeiro paso na iniciativa xa proposta a Navantia para a creación dun pool de investidores privados que permitan adaptar as infraestruturas do estaleiro a buques de maior tamaño e así impulsar a súa competitividade e incrementar as súas oportunidades de negocio na área de reparacións.

A Xunta segue sen escatimar esforzos para garantir o futuro do naval galego e, concretamente, do naval de Ferrol, co obxectivo de dotalo de carga de traballo e garantir a súa viabilidade. Así o ten amosado a alianza estratéxica acadada con Pemex que xa frutificou na firma de dous contratos cos estaleiros Barreras, en Vigo, e Navantia, en Ferrol, para a construción de dous floteis.

Ademais, a Xunta, a través do convenio con Pymar, e co obxectivo de apoiar as operacións financeiras dos estaleiros galegos e impulsar as súas contratacións, mobilizará durante 2013, máis de 60 millóns de euros en avais.