Manquiña e Resonet homenaxean a Vidal Bolaño e Rosalía polas Letras Galegas

A Consellería de Cultura, Educación e Ordenación Universitaria convida a todos os galegos e galegas a celebrar do Día das Letras Galegas no monte Gaiás da man de Manquiña e do grupo Resonet. Será unha dobre homenaxe ao escritor e autor teatral Roberto Vidal Bolaño e á poetisa Rosalía de Castro nunha xornada que arrancará ás 12,00 horas e que incluirá unha actividade paralela para os máis pequenos. A actividade é totalmente de balde previa inscrición en www.cidadedacultura.org.

O evento Goza das Letras comezará ás 12,00 horas na Biblioteca e Arquivo de Galicia cun saúdo de benvida de Manuel Manquiña, que será o encargado de recordar a figura do homenaxeado este ano no Día das Letras Galegas coa lectura do manifesto de Roberto Vidal Bolaño ‘Teatro do aquí’. Do mesmo xeito, Manquiña interpretará na Cidade da Cultura unha pasaxe da obra ‘Días sen gloria’ de Vidal Bolaño, estreada neste mes de abril no Salón Teatro baixo a dirección de Fefa Noia.

Banda sonora de Rosalía

Tras o teatro, o grupo de música antiga Resonet poralle banda sonora á xornada a través dunha homenaxe a unha das nosas poetisas máis universais: Rosalía de Castro. Con motivo do 150 aniversario da obra ‘Cantares Gallegos’, Resonet ofreceralle ao público do Gaiás a interpretación de varias destas cantigas populares publicadas en Vigo o 17 de maio de 1863.

Nesta proposta, Resonet toma dos cancioneiros musicais populares as melodías e ritmos das cantigas nas que se inspirou Rosalía e, dun modo subxectivo, poranlle música a algunhas das poesías máis representativas dos ‘Cantares Gallegos’ como Has de Cantar, Campanas de Bastabales, Adios ríos, adios fontes ou Airiños, airiños aires.

Sesión infantil: de 6 a 12 anos

De forma paralela a esta dobre actuación, os máis pequenos poderán gozar do Día das Letras dunha forma lúdica e didáctica. Será a través do ‘Xogo do Touporroutou’, un proxecto interactivo no que nenos de 7 a 12 anos se aproximarán á figura de Roberto Vidal Bolaño na súa faceta profesional, literaria e vital a través de xogos nos que desenvolver a memoria e a resolución dun divertido quebracabezas literario.