Silvia Pérez Cruz ofrece un concerto en Compostela o 8 de xuño na Cidade da Cultura

A Consellería de Cultura, Educación e Ordenación Universitaria converte o sábado 8 de xuño o Museo Centro Gaiás nun grande escenario para acoller o concerto de Silvia Pérez Cruz, artista revelación do 2012 e recente gañadora dun premio Goya á mellor canción pola película Blancanieves.

A voz luminosa, cálida e versátil de Silvia Pérez Cruz estará acompañada na Cidade da Cultura por Javier Colina, un dos mellores e máis celebrados contrabaixistas actuais. Xuntos presentarán En la imaginación, traballo no que revisan clásicos da música cubana seleccionados e arranxados polo músico navarro. Ao feliz encontro de ambos os dous talentos súmanse Albert Sanz ao piano e Marc Miralta á batería, completando a formación jazzística.

O concerto de Silvia Pérez Cruz & Javier Colina Trío terá lugar o sábado, 8 de xuño, a partir das 21:00 horas e as entradas xa están á venda no Punto On da Cidade da Cultura ou a través de www.servinova.com a partir de 10 euros.

Música que emociona

Tras o éxito de Noa & Solis String Quartet, o de Silvia Pérez Cruz será o segundo concerto de Pel de Galiña, ciclo co que a Cidade da Cultura busca ofrecer cinco noites abertas á fusión, aos ritmos suxerentes, ás voces poderosas e cálidas e aos sons únicos.

O seguinte concerto do ciclo terá lugar o 21 de xuño, cando o Gaiás celebre o Día da Música ao son da pianista venezolana Gabriela Montero e as súas prodixiosas improvisacións. Xullo comezará da man de Uxía, unha das nosas grandes voces, que estará no Gaiás o día 12 acompañada de Sérgio Tannus, Xoan Porto, Paulo Silva e o fadista António Zambujo. A clausura deste ciclo terá lugar o 26 de xullo e estará protagonizada polo norteamericano Gregory Porter, considerado como unha das voces máis brillantes e persoais do jazz actual.

Todos eles compoñen un cartel marcado pola diversidade de estilos pero unido por un denominado común: ofrecer música que emociona. Con este ciclo, a consellería de Cultura, Educación e Ordenación Universitaria continúa afondando na configuración dunha programación para o Gaiás aberta a todos os públicos e ás máis diferentes disciplinas artísticas. Un programa cultural que non sería posible sen as aportacións da Fundación privada Gaiás, que financia as actividades que teñen lugar na Cidade da Cultura.

Entradas a partir de 10 euros

Os prezos para todos os concertos do ciclo Pel de galiña oscilan entre os 10 euros na Zona B e os 12 na Zona A, prezo ao que haberá que sumarlle os gastos de xestión no caso de que se adquiran no portal ou no teléfono de Servinova. As entradas tamén poderán adquirirse o mesmo día do concerto desde as 19:00 horas na billeteira do Museo Centro Gaiás a un prezo de 12 euros na Zona B e de 15 euros na Zona A.

A Cidade da Cultura tamén pon a disposición do público o pack3, polo que ao mercar dous billetes, o terceiro sae a un euro, é dicir, un total de 21 euros na Zona B e 27 euros na Zona A. Este pack3 só está dispoñible en venda anticipada a través do teléfono de Servinova 902 504 500 e consumible nun único concerto.