O acordo pesqueiro entre España e Portugal na UE beneficia ao sector galego

Un total de 110 embarcacións galegas de arrastre de fondo, cerco e de artes menores poderanse beneficiar do acordo asinado entre o ministro de Agricultura, Alimentación y Medio Ambiente, Miguel Arias Cañete, e maila súa homóloga portuguesa, Mar Assunçäo Cristas, en Bruxelas.

O novo acordo -que foi asinado por primeira vez no ano 2003 e que ten unha vixencia aproximada de dous anos- substitúe ao anterior e prorroga os termos nos que se viña desenvolvendo ata o e agora pero incluíndo importantes novidades que son beneficiosas para a frota galega. Entre elas destaca que a partir de agora, os barcos españois e portugueses aplicarán as medidas técnicas do país no que se realicen as pesquerías faenando en igualdade de condicións ambos os países.

Deste xeito, cando os barcos españois faenen en augas portuguesas aplicarán as normas do estado luso e cando os portugueses faenen en augas españolas, aplicarán as normas técnicas que rexen en España, cuestión que non viña acontecendo ata o de agora.

Asemade, no que ten que ver coas descargas, contémplase que os límites que rexan sexan os que estipule a organización de produtores do porto no que se realice a descarga, independentemente da nacionalidade do buque ou da zona na que se realizasen as capturas.

Con este acordo refórzase a cooperación entre ambos países -ademais de no exposto- en materia de control e inspección ao tempo que se conseguen unhas regras de xogo igualitarias para os dous estados e os seus traballadores do mar.