130 actividades completaron o programa de dinamización lingüística FalaRedes 2013

A Consellería de Cultura, Educación e Ordenación Universitaria clausura a segunda edición do programa de dinamización lingüística “FalaRedes”, que despregou 130 actividades de promoción social do galego polos concellos da Rede de Dinamización Lingüística (RDL) da Xunta de Galicia durante este ano. As cinco iniciativas gratuítas do programa -“Acuario”, “As pombas de Carboeiro”, “A nena e o grilo nun barquiño”, “Rosalía Pequeniña” e mais “Augalingua”- fomentaron o uso e valoración positiva da lingua propia de Galicia entre a infancia e a mocidade, enchendo o seu tempo de lecer con propostas de calidade no noso idioma.

A derradeira actividade de “FalaRedes 2013” celebrarase esta tarde en Curtis, na Oficina Municipal, ás 17:00 horas, onde terá lugar a última función do espectáculo poético-teatral “Acuario”, que conclúe tamén o seu itinerario por 30 concellos da RDL.

‘Acuario’

Da man da comunicadora María Canosa e mais do Teatro dos Ghazafellos, os máis pequenos trasladáronse ao fondo dun acuario cheo de peixes e de humor para achegarse á poesía en lingua galega e coñecer os nomes dos animais que alí habitaban.

“Acuario” despregou durante o último trimestre do ano un total de 30 sesións por outros tantos concellos da RDL: Neda, Lobios, A Laracha, A Coruña, Celanova, Castrelo de Miño, Ourense, Ponteceso, Cerceda, Ordes, A Bola, A Peroxa, Pontedeume, Castro de Rei, Cospeito, Santiago de Compostela, Cotobade, Cee, Negreira, Muxía, Cabana de Bergantiños, Aranga, Dodro, Boqueixón, Muros, Melide, A Cañiza, A Baña, Corcubión e, despois da sesión desta tarde, Curtis.

‘As pombas de Carboeiro’

Outra das actividades de “FalaRedes 2013” foi “As pombas de Carboeiro”, un espectáculo musical e teatral a cargo da compañía Fantoches Baj que se montou en colaboración coa mocidade integrante das bandas de música de 19 concellos. Deste xeito, os mozos e mozas, a partir da súa afección musical, tomaron parte activa no desenvolvemento da propia actividade de dinamización en cadanseu municipio da RDL.

O itinerario de “As pombas de Carboeiro” incluíu as localidades de Vedra, Cambados, O Carballiño, O Rosal, Negreira, Melide, Padrón, Ortigueira, Fisterra, Tui, Valga, Ribadavia, Brión, Boiro, Viveiro, Foz, Sober, Lalín e Oleiros.

‘A nena e o grilo nun barquiño’

“A nena e o grilo nun barquiño” achegou o seu espectáculo de música, narrativa, poesía, teatro e baile en directo a 23 concellos da RDL: Carral, Ponte Caldelas, Outeiro de Rei, Cee, Ribadumia, Outes, Rois, Zas, Oroso, O Barco de Valdeorras, Vilaboa, Bueu, A Porqueira, Santiago de Compostela, Vila de Cruces, Piñor, Abegondo, Avión, Redondela, Caldas de Reis, O Carballiño, Malpica de Bergantiños e Cerceda.

Neste musical, os espectadores de todas as idades puideron vibrar coa viaxe da nena e mais do grilo por un mundo máxico e cheo de aventuras, acompañados en directo por 13 cancións do compositor Magín Blanco, un dos referentes actuais na discografía infantil en galego.

“Rosalía Pequeniña”

A música galega e en directo tamén foi o ingrediente principal do concerto “Rosalía Pequeniña”, no que a popular cantante Uxía versionou os poemas máis coñecidos da poetisa galega para celebrar a efeméride dos 150 anos da publicación de Cantares gallegos por 40 municipios da RDL. E é que dende o mes de maio, a actividade festexou a poesía e a música en galego nos concellos de Pontecesures, Ferrol, Dodro, Mos, Ponteceso, Xunqueira de Espadanedo, Melón, Sobrado, Teo, Val do Dubra, Miño, A Pontenova, Palas de Rei, Betanzos, Xove, Dumbría, Forcarei, A Lama, Marín, Cerdedo, Tui, Cuntis, Brión, Fene, A Baña, O Vicedo, Neda, Ponteareas, Toques, Cariño, Mondariz-Balneario, Carballedo, Cangas, Lousame, Baiona, Campo Lameiro, A Pobra do Brollón, Laxe, Carnota e Pontedeva.

“Augalingua”

A actividade estival “Augalingua”, dirixida a cativos de 6 a 12 anos, botou a andar a principios de xullo nas piscinas municipais ou nas praias fluviais de concellos do interior de Galicia. Durante os meses de verán, a xente miúda da casa puido participar nestas divertidas xincanas nas que os xogos de rapidez ou de axilidade se mesturaron con outros de lingua.

A actividade de dinamización lingüística chegou a un total de 18 municipios durante os meses de xullo e agosto: San Cristovo de Cea, Maside, Toén, Vilamarín, Taboada, Monterroso, Guntín, Ribas de Sil, Parada de Sil, O Barco de Valdeorras, A Veiga, Sarreaus, A Bola, Muíños, Cerceda, Lalín , Ordes e Castrelo de Miño

Toda a información sobre o programa “FalaRedes 2013” e as súas actividades pódese consultar no web www.xunta.es/linguagalega/falaredes_2013.