Xosé A. Touriñán xunta na súa casa aos mellores humoristas de Galicia este venres na primeira edición do ‘Castelo Conta’

Non será, en palabras de Touriñán, unha actuación calquera. E é que en Castelo cóidanse todos os detalles, e desde a organización afánanse por vestir a polideportiva da pequena aldea ao pé do Xalo e convertela en todo un clube da comedia, con banda de música incluída, que para a ocasión será a dos betanceiros ‘Os que vand’.

Nun escenario central estarán os monologuistas, nun dos laterais a banda, e noutro unha gran pantalla para seguir o espectáculo con vídeo en directo. Diante, mesas de entre seis e dez prazas que xa se poden reservar no teléfono 698 111 311 e no enderezo electrónico casteloconta@festascastelo.com, por 50 € con botella incluída. O resto do público situarase xusto detrás, tamén sentado ata cubrir o aforo.

Os cinco monologuistas actuarán xuntos e por separado, tirando do mellor do seu repertorio, con moita improvisación e mesmo incentivando a participación do público. Para antes do evento, bocatas de chourizo criollo á grella en pan de Carral, preparados polos veciños de Castelo, e que se venderán a 2 euros.

Encallados tamén se estréa en Castelo

O Castelo Conta dará comezo contra as 23.30 horas, porque antes o mesmo recinto da polideportiva desta parroquia de Culleredo acollerá a proxección do filme Encallados, dirixido por Alfonso Zarauza e que ten entre os seus protagonistas a Federico Pérez. Unha historia de cinema dentro de cinema, que narra as dificultades de tres compañeiros para facer unha película sobre a traxedia do Prestige, cun contrapunto cómico que ten sorprendido xa a centos de persoas nas estréas que se están a realizar por toda Galicia.