O PPdeG defende instrumentos financeiros para apoiar a autónomos, emprendedores e pemes

O portavoz do Grupo Popular, Pedro Puy, afirmou que o PPdeG proporá no Pleno a designación de persoas con “perfís profesionais sen vencellos estreitos coa militancia política” para ocupar as vacantes existentes no Consello de Contas, “do mesmo xeito que fixemos coa proposta de Milagros Otero para Valedora do Pobo”. Respecto da sesión plenaria, o Grupo Popular defenderá a posta en marcha de instrumentos financeiros para apoiar aos autónomos, emprendedores e pequenas e medianas empresas; así como o desenvolvemento normativo da Rede galega de atención temperá.

Ao remate da Xunta de Portavoces, Pedro Puy informou que, antes da celebración da sesión plenaria ordinaria, terá lugar un Pleno extraordinario para a elección dun senador en representación da Comunidade Autónoma, cuxa proposta corresponde ao Grupo Socialista de acordo coa normativa vixente.

Vacantes no Consello de Contas

A continuación, e como primeiro punto na orde do día da sesión ordinaria, procederase á elección de tres conselleiros ou conselleiras do Consello de Contas, postos que levan varios meses vacantes por renuncias ou defuncións. O portavoz popular manifestou que o Grupo Popular avoga por persoas con “perfís profesionais independentes, compatibles tanto coas funcións que ten o Consello de Contas na actualidade como as que vai asumir coa reforma da Lei que o regula”.

En resposta aos grupos minoritarios da oposición, Pedro Puy negou que este proceso se estea facendo de costas ao Parlamento, porque “se están cumprindo todos os trámites previstos na Cámara”. Sobre a proposta de Milagros Otero para Valedora do Pobo, lembrou que “procedemos ao rexistro da candidatura e posteriormente fixemos pública a noticia”.

Institucións autonómicas

“Se o argumento é que hai un intento de afortalar as institucións autonómicas dun réxime que está en descomposición, entendo que o que queira descompoñer o réxime se sinta máis cómodo con institucións nas que non se producen as renovacións que marca a norma e de acordo cos mecanismos que marcan as normas”, manifestou Puy. “Nós entendemos que é bo para a comunidade autónoma e para as institucións autonómicas, porque estamos pola labor de afortalar as institucións autonómicas de control do Goberno autonómico”, engadiu.

Así mesmo, negou que o procedemento para a elección da nova Valedora do Pobo sexa “escuro” e explicou que esta candidatura vai ser debatida na Comisión de Peticións e posteriormente será votada a nominación polo Pleno da Cámara, onde precisará dunha maioría de tres quintos para saír adiante.

Respecto da candidatura de Milagros Otero para Valedora do Pobo, Pedro Puy considerou que é unha profesional “moi axeitada para poñerse á fronte dunha institución que está a cumprir un papel moi relevante na Comunidade galega”, porque “procede do mundo académico, ten un criterio independente e está especialmente interesada e especializada en cuestións relativas aos dereitos humanos”.

Por outra banda, Pedro Puy avanzou un “Pleno longo” para a vindeira semana, no que se van debater 29 puntos na orde do día. “Destas iniciativas, dúas son a proposta do Goberno, catro do Grupo Popular e o 80 por cento restante corresponden aos grupos da oposición, polo que a Cámara traballa e o fai a impulso de todos os grupos, pero con especial atención ás tarefas de control por parte da oposición”, apuntou.

A sesión plenaria inclúe o debate para a súa aprobación da proposición de lei de dereitos e garantías da dignidade dos enfermos terminais, así como o debate para a toma en consideración da proposición de lei do BNG para a reforma da Lei de Caza de Galicia. A continuación, terán lugar a comparecencia aprazada do conselleiro de industria para dar conta do programa RIS3 e do conselleiro de Cultura e Educación para informar das novidades na regulación dos currículos de ESO e bacharelato en desenvolvemento da LOMCE.

Emprendedores e atención temperá

O Grupo Popular solicitou a incorporación de dúas proposicións non de lei. A través da primeira, solicítase á Xunta a posta en marcha dunha serie de instrumentos financeiros para apoiar os investimentos e o funcionamento operativo dos autónomos, emprendedores e pequenas e medianas empresas. “Estamos iniciando un proceso de recuperación económica e para afortalar este crecemento é fundamental que as empresas teñan acceso ao financiamento para ganar en competitividade e tamaño”, indicou Puy.

A segunda proposición non de lei do Grupo Popular solicita ao Goberno galego o desenvolvemento do Decreto 183/2013 polo que se crea a Rede Galega de atención temperá, unha iniciativa a través da que se establece unha cooperación entre os servizos sociais, sanitarios e educativos para atender aos nenos de 0 a 6 anos que están en situación de risco, de non aproveitar as súas capacidades e por elo teñen transtornos no desenvolvemento.

Por último, o Grupo Popular preguntará ao Goberno sobre as medidas que ten previsto para protexer o dereito á vivenda das familias que están en risco de sufrir desafiuzamento e sobre a valoración que fai da Plataforma de Emprendemento Feminino.

O Grupo Popular propón a Milagros Otero como nova Valedora do Pobo

O Grupo Popular vén de rexistrar no Parlamento de Galicia unha proposta para a designación de Milagros Otero Parga como Valedora do Pobo.Nacida en Santiago de Compostela en 1960, Milagros Otero é doutora en Dereito pola Universidade de Santiago desde 1987 e profesora titular entre os anos 1989 e 2011. Na actualidade, é catedrática de Filosofía e Dereito da Universidade compostelá, coordinadora da Facultade de Dereito para os convenios bilaterais con Latinoamérica e secretaria do Programa de Doutorado de Dereito.Otero Parga foi a primeira muller académica numeraria da Real Academia Galega de Lexislación e Xurisprudencia, así como a primeira muller catedrática de Filosofía do Dereito en Santiago e a primeira e única muller decana da Facultade de Dereito da Universidade de Santiago. Tamén exerceu como secretaria da Comisión de Doutorado e terceiro ciclo da Universidade de Santiago. Entre os recoñecementos que recibiu, ten no seu poder a Medalla de Prata de Galicia, a insignia de ouro da Facultade de Dereito e a insignia de ouro da Universidade de Santiago. É asesora académica da Comisión de Dereitos Humanos do Estado de México e da Escola Xudicial deste mesmo Estado, organismo que tamén a nomeou Magister Honoris Causa.Milagros Otero é profesora invitada nalgunhas das más prestixiosas universidades americanas en Bos Aires, Santiago de Chile, Sao Paulo e Montevideo. Asidua visitante de México, foi conferenciante nas Universidades Iberoamericana, Panamericana, Anahuac, Intercontinental, Autónoma do Estado de México, Instituto Tecnológico de Monterrey, Universidade Xudicial de Durango e Popular Autónoma del Estado de Puebla.Entre os seus libros e artigos publicados figuran Estudios de Derechos Humanos: Introducción a los Derechos Humanos, Objeción de conciencia y Ética judicial; y Dignidad y solidaridad. Dos derechos fundamentales. Na actualidade, os seus campos de estudio son a argumentación xurídica, dereitos humanos e mediación.