A Xunta de Galicia prevé chegar en 2023 aos 6 millóns de viaxes gratis en transporte público para menores de 21 anos, 1 millón máis que en 2022

A campaña 'Móvome' ofrece unha imaxe moderna e fresca do transporte público galego, un camiño de presente e de futuro. A día de hoxe, arredor de 150.000 mozos e mozas da nosa comunidade desfrutan de desprazamentos gratuítos no transporte público galego, o que supón unha aforro medio mensual de case 500.000 €. A Xunta destina cada ano preto de 100 millóns de euros ao transporte público autonómico, uns 300.000 euros cada día.

Esta campaña contempla ademais a renovación de preto de 3.500 liñas de transporte interurbano, incrementando o número de localidades ás que chega o autobús, e fomentando novas modalidades como o trasporte compartido ou baixo demanda. En canto ás infraestruturas, a renovación chega ás estacións intermodais nas cidades e á intermodalidade nas vilas.

Por outra banda, cabe destacar os incentivos económicos directos aplicados a través das tarxetas de Transporte Público de Galicia, e as bonificacións que desde hai máis dun ano chegan ao 50%.

Todas estas medidas fixeron que no primeiro semestre do ano 2023 o transporte público galego rexistrase 18 millóns de viaxes, un 17% por enriba das cifra acadadas no primeiro semestre de 2022. No verán este incremento continuou en progresión, cun 30% máis de viaxeiros en xullo de 2023 que no mesmo mes de 2022.

Tres son os principais motivos principais que explican a revalorización actual do transporte público: o contexto climático (cómpre reducir os niveis de contaminación), a dispersión da poboación (requírese unha oferta de servizos que garanta a mobilidade) e o encarecemento dos combustibles.

Así, a campaña 'Móvome' contribúe a incentivar o uso do transporte público como alternativa de mobilidade máis segura, limpa e accesible, mentres dá a coñecer o traballo feito para a súa renovación na nosa comunidade e para a mellora das infraestruturas, ademais dos beneficios concretos que ofrece o sistema xestionado pola Xunta.