Convocadas axudas para rehabilitar inmobles do Programa de mobilización de vivendas para o alugueiro

Entre os tipos de actuacións para as que se poderán solicitar axudas figuran as obras de conservación e mantemento dos inmobles, así como as de rehabilitación que sexan necesarias para garantir a habitabilidade da vivenda e o correcto funcionamento das súas instalacións. Tamén serán subvencionables os axustes na distribución do inmoble que non impliquen unha alteración substancial do mesmo; a adquisición e colocación de mobiliario de cociña e electrodomésticos; e o cambio de sanitarios, bañeira e mamparas.

En todo caso, as obras anteriormente sinaladas só se subvencionarán en caso de que se realicen a partir do 4 de novembro de 2023 e sen que o seu o prazo de execución poida exceder, en ningún caso, do 30 de abril de 2025.

Compatibilidade con outros incentivos

Ademais, as axudas do Programa Rehaluga son compatibles con aquelas concedidas para o mesmo obxectivo por parte doutras administracións públicas sempre que o importe de todas elas non supere o custo total das actuacións.

Cómpre lembrar que o Programa de mobilización de vivendas para o alugueiro foi posto en marcha pola Xunta a finais do ano 2022 co obxectivo de incorporar inmobles sen uso ao mercado de alugueiro a prezos accesibles coa colaboración dos axentes inmobiliarios.

Neste sentido, na súa condición de axentes colaboradores, estes profesionais son os encargados de localizar vivendas que reúnan os requisitos axeitados para incorporarse ao programa e facilitar a sinatura do correspondente contrato entre arrendador e arrendatario.