3.000 ninos gallegos comienzan el curso en la red gallega de Galescolas

Nota de prensa remitida por el Gabinete de Comunicación de la Vicepresidencia de la Xunta de Galicia:

O vicepresidente da Xunta, Anxo Quintana, abriu en Vilaboa o curso 2007-2008 na Rede Galega de Escolas Infantís. 3.000 nenos e nenas galegos comezan a encher de vida o proxecto Galescola, que botan a andar con 48 centros en todo o país. 23 novas galescolas abren por primeira vez as súas portas neste trimestre, o que supón a creación de 1.000 novas prazas na educación infantil pública de 0 a 3 anos, e a estes centros hai que sumar as 25 escolas infantís que xa xestionaba a Vicepresidencia da Xunta de Galicia, que dan cabida a 2.079 cativos. Durante o acto, ao que tamén asistiu a secretaria xeral da Igualdade, Carme Adán, Quintana sinalou a posta en marcha da Rede Galescola como “exemplo do cambio galego”.

O vicepresidente considerou que a posta en marcha destas galescolas marca un punto de inflexión para o comezo do que será un novo tempo na historia da educación infantil de 0 a 3 anos en Galiza, e dixo que as galescolas simbolizan unha auténtica forza para o cambio e unha esperanza para o futuro do país. Quintana asegurou que este proxecto, que cualificou como o buque insignia da revolución tranquila do benestar que impulsa a Vicepresidencia, vén dar resposta á necesidade urxente de superar as limitacións que presentaba Galiza neste ámbito, unhas limitacións inxustificables en calquera país que confía na infancia como protagonista do seu progreso. “As galescolas son a nosa resposta, unha iniciativa pioneira e cargada de futuro, pensada por e para o noso país”, afirmou.

Quintana explicou que as galescolas van ser, ante todo e sobre todo, boas escolas. Pero máis alá disto, o vicepresidente reclamou para estes centros un importante papel á hora de impulsar a educación como dereito no ciclo de 0 a 3 anos, coas máximas garantías de calidade e igualdade de oportunidades. Así mesmo, segundo dixo, van supoñen un avance na promoción das políticas de apoio ás familias e favorecerán a conciliación da vida familiar e laboral, facilitando a incorporación da muller ao escenario profesional. Deste xeito, o vicepresidente considerou estes centros como “un recurso para a igualdade”.

De aquí ao final da lexislatura, a Rede Galescola sumará un total de 121 novos centros, cun investimento total de 33 millóns de euros, que suporán a creación de máis de 6.000 novas prazas e a xeración de 1.200 postos de traballo. A taxa de cobertura de prazas públicas na educación infantil con estes novos centros pasará na provincia da Coruña do 13 ao 23%, na de Pontevedra do 10 ao 20%, e situará ás provincias de Lugo e Ourense á cabeza do Estado nesta ratio, superando as 33 prazas por cada 100 nenos que recomenda a Unión Europea, cun 36% e un 40% respectivamente.

Quintana salientou que o volume de recursos destinados a esta iniciativa avalan o carácter prioritario deste proxecto, principal alicerce da política familiar emprendida pola Vicepresidencia. Así, as 23 galescolas de nova construción xestionadas polo Consorcio Galego de Servizos de Igualdade e Benestar que agora abren as súas portas supuxeron un investimento por parte da Vicepresidencia de 6,2 millóns de euros. Estes centros contarán cun total de 125 traballadores e traballadoras, entre mestres, educadores, e persoal de servizos sociais. Trátase das galescolas de Boiro, Rianxo, Ponteceso, Cambre, Fene, Ortigueira e Zas, na provincia da Coruña; Taboada, A Fonsagrada e Pantón, na de Lugo; Xinzo de Limia, Coles, Pereiro de Aguiar, Vilamarín e A Rúa, en Ourense; e O Rosal, Portas, Covelo, Crecente, Campo Lameiro, Poio, Vilaboa e Cerdedo, na de Pontevedra. Así mesmo, Quintana xa adiantou que no período escolar do 2008 se van sumar a esta rede outros 20 centros.

Novo modelo

O vicepresidente puxo de relevo que a Rede Galescola representa a renovación no ámbito da educación infantil de 0 a 3 anos, deixando atrás un modelo anterior caracterizado pola fragmentación e os abismos de calidade, pola oferta insuficiente e polas limitacións en materia de organización, servizos e procesos entre unhas escolas e outras, para pasar a unha nova forma de entender a educación infantil máis aberta, dinámica e interactiva. O novo modelo que impulsa a Vicepresidencia desbota a visión tutelar e puramente asistencial destes recursos para substituíla por un enfoque que pon a mirada no desenvolvemento socio-educativo dos cativos. A sostenibilidade deste modelo en rede atopa a súa base nun moderno estilo de xestión avalado polo Consorcio Galego de Servizos de Igualdade e Benestar, que a día de hoxe integra xa a 193 concellos galegos.

Calidade, identidade e compromiso de país

Para Quintana, tres son os alicerces nos que se fundamenta a iniciativa das galescolas: igualdade de oportunidades, identidade e calidade. Neste senso, explicou que as galescolas representan un cambio de perspectiva importante: “da infancia das necesidades á infancia dos dereitos”, para que “todos os nenos e nenas de Galiza, vivan onde vivan, teñan os mesmos recursos e oportunidades”. Dende esta visión, explicou o vicepresidente, as galescolas son un instrumento para o reequilibrio territorial que servirá para rachar dunha vez por todas co círculo vicioso que levaba a non poñer servizos porque non había xente e logo a que non haxa xente por non haber servizos. É, polo tanto, unha visión dos servizos sociais como “construtores de país”, como cómplices do dinamismo demográfico e do progreso en equilibrio.

Quintana sinalou a identidade como o segundo pivote da Rede Galescola, unha iniciativa pensada para Galiza e en clave galega. Así, explicou que as galescolas van proxectar unha educación sen complexos, respectuosa coa nosa cultura e orgullosa da nosa lingua, para educar ás xeracións do futuro no respecto e na coherencia co que somos.

Do mesmo xeito, o vicepresidente reivindicou estes centros como referente de calidade. Neste camiño, explicou que, xunto ás máis modernas infraestruturas, as galescolas priman o traballo en equipo e a utilización das novas tecnoloxías. A rede funciona como unha auténtica comunidade educativa que dá estímulos á participación, ao compromiso, á interacción e á comunicación de tódolos axentes implicados no proceso educativo, con especial atención ás familias. Así mesmo, a rede quere adaptarse ás novas demandas da sociedade, introducindo servizos complementarios orientados a que a conciliación das familias sexa unha realidade cada vez máis posible.

Na busca da excelencia, as galescolas dispoñen, ademais, dunha completa oferta educativa e pedagóxica para os máis pequenos que vén avalada polo Plan de Calidade e Mellora Pedagóxica 2006-2009, cun investimento que supera os 8,5 millóns de euros. A secretaría xeral de Igualdade, Carme Adán, explicou que o Plan de Calidade na educación de 0 a 3 anos ten como unha das súas liñas estratéxicas desenvolver un proxecto educativo de cada centro, ao tempo que pretende impulsar a calidade do servizo, potenciando a participación dos usuarios. Coa aplicación deste plan, sinalou Adán, refórzase o proceso formativo e de recoñecemento profesional, ao tempo que se garante a inclusión das novas Tecnoloxías da Información e a Comunicación (TIC), non só coa súa introdución nas aulas, senón tamén con iniciativas innovadoras como é a creación dun portal educativo, www.galescolas.net

Segundo explicou a secretaria xeral, o proxecto educativo das Galescolas, en cuxa elaboración participa activamente todo o persoal do centro, está dirixido a unha infancia protagonista tanto na construción dos coñecementos e no seu desenvolvemento e presta especial atención tanto ao contorno do menor coma ao deseño dos espazos, de xeito que se propicie un ambiente educativo amable, acolledor e estético que responda ás necesidades de nenos e nenas e dos profesionais.

A organización do tempo é outros dos sinais do modelo de calidade que van a impoñer as galescolas: 35 das 39 horas semanais da xornada laboral do persoal destes centros dedicaranse á atención directa dos nenos. As restantes, o 10%, irán destinadas á preparación e formación continua de persoal así como ás titorías coas familias e a preparación do material didáctico. Cúmprense así os obxectivos fixados pola Rede de Atención á Infancia da Comisión Europea, que recomenda que unha décima parte da xornada laboral se centre na formación do equipo docente.

Xunto á importancia dos contidos, cobra relevancia a dotación en material pedagóxico e didáctico, así como os recursos de apoio. Ao respecto, no acto de hoxe presentouse tamén a roupa de traballo dos educadores e os mandilóns dos que gratuitamente disporán a partires do próximo mes todos os nenos e nenas que asistan ás galescolas. O seu deseño é resultado dun concurso de ideas convocado pola SX de Igualdade. Un instrumento funcional, práctico e necesario que ademais permitirá identificar de forma sinxela á rede pública, contribuíndo á creación dunha identidade corporativa propia.

Aposta polo público

Finalmente, Quintana puxo de relevo que a Vicepresidencia segue dando pasos no seu compromiso coa infancia, a través dunha estratexia que se apoia no público como garantía dos dereitos. Xunto a configuración dunha rede galega de escolas infantís baseada na innovación e na mellora continua –a Rede Galescola–, a Vicepresidencia está destinando importantes recursos a apoiar ás administracións locais na creación e apertura de novos centros de atención aos máis pequenos. Nos primeiros dous anos de goberno, os investimentos na creación, dotación e mantemento de infraestruturas socioeducativas para os máis pequenos teñen dado un salto significativo, experimentando un incremento de 5 millóns de euros por ano. Así pasamos dos 25,9 millóns de euros investidos en 2005 aos 35,7 millóns no presente ano, o que supón un aumento do 38%. Só no relativo á construción e equipamento de novos centros, Galiza ten pasado de investir 7,6 millóns anuais en 2005 aos 10,7 millóns da actualidade, un 40% máis. Para o vicepresidente, “as cifras mandan e demostran a aposta da Vicepresidencia polo público”: “O número de escolas de titularidade pública creadas entre 2005 e 2007 incrementouse nun 69%, pasando das 107 na nosa chegada ao goberno, aos 181 centros cos que Galiza conta na actualidade”, indicou.

Así mesmo, salientou que a distribución destes equipamentos sociais no mapa galego “demostra o noso compromiso coa Galiza interior”, a confianza no papel dos servizos sociais para darlle a volta ás tendencias da falla de oportunidades. Sobre isto, indicou que nestes dous primeiros anos de goberno, o incremento no número de centros públicos ten acadado nas provincias de Lugo e Ourense valores espectaculares, do 100% e do 190% respectivamente. Traducido a prazas dispoñibles, este empeño ten permitido incrementar a oferta de prazas nos centros de titularidade pública, pasando das 6.101 en 2005 ás 9.325 ofertadas nestes intres, o que supón un aumento do 53%.