El presidente de la Xunta plantea en el Parlamento gallego un paquete de cinco leyes anticorrupción con 50 medidas que se aprobarán en 50 días

Nota de prensa remitida por el Gabinete de Comunicación de la Xunta de Galicia:

O presidente do Goberno galego, Alberto Núñez Feijóo, presentou nun pleno extraordinario un Programa de Impulso Democrático con 5 leis e 50 medidas en 50 días para que Galicia vaia por diante en transparencia e exemplaridade.

O presidente da Xunta compareceu para dar conta do novo impulso democrático que se vai desenvolver ao longo dos próximos meses “e xa desde este mesmo xoves no Consello”, cumprindo así o seu compromiso de comparecer na Cámara para abordar este debate e tratar de acordar coa oposición estas iniciativas. “Para que sexa o Parlamento, onde falamos os representantes do pobo, o primeiro lugar que poida tomar razón das nosas intencións para seguir mellorando a calidade democrática de Galicia”, insistiu.

“Creo que a Democracia representativa non está en cuestión, pero si debemos cuestionarnos de xeito permanente como podemos mellorala, para estar cada vez máis preto do que os cidadáns esperan de nós, como representantes seus; e para deixar cada vez unha marxe menor a quen pretenda defraudar o obxectivo polo que somos elixidos”, abundou.

Nesta liña, Feijóo incidiu no seu compromiso de dar conta do que a Xunta leva feito, e tamén do que vai facer para seguir loitando “contra a presenza desas persoas que utilizan a política para os seus intereses”, a través de tres liñas de actuación principais: “dotar á acción do Goberno da transparencia máxima; conseguir, ao mesmo tempo, un maior control externo do Goberno; e garantir unha maior participación cidadá na mellora do sistema de democracia representativa que nos temos dado”.

Máis polo miúdo, precisou que as propostas presentadas hoxe “van no sentido do que xa vimos aplicando desde que chegamos ao goberno en 2009: máis instrumentos para garantir o compromiso ético dos gobernos; e máis control e transparencia da acción do goberno”.

MEDIDAS DE IMPULSO DEMOCRÁTICO

1. Medidas no ámbito dos Gobernos

Nun primeiro termo, Feijóo subliñou que o programa recolle accións en moitos ámbitos, que se poden agrupar en dúas grandes liñas: o impulso da transparencia dos datos públicos, a partir dunha nova lei galega e dos seus desenvolvementos, da posta en marcha do Portal de Transparencia e Goberno Aberto de Galicia e do reforzo do portal Open Data; e unhas maiores esixencias de ética pública, cunha parte dedicada a bo goberno na Lei de transparencia, cun seguimento do Código Ético e con novas esixencias para o desempeño do altos cargos.

O responsable autonómico avanzou que este xoves o Consello da Xunta aprobará as medidas incluídas neste Programa de Impulso Democrático máis vinculadas ao Goberno e a Administración, entre as que citou algúns aspectos importantes como:

1. A elaboración e tramitación do proxecto de lei dunha nova Lei de ordenación da asistencia xurídica da Administración Xeral da Comunidade Autónoma de Galicia e do seu sector público. Unha lei que dilucidará con precisión cales son os casos nos que un empregado ou autoridade pública podería recibir asistencia letrada da Administración. Deste xeito, asegúrase que, en ningún caso, unha persoa que fose culpable do delito do que se lle acusa vexa a súa defensa pagada cos cartos dos contribuíntes.

2. O impulso e seguimento das medidas previstas no Código Ético Institucional da Xunta de Galicia.

3. O inicio dun plan de reasignación de efectivos na administración autonómica destinado a reforzar as unidades dedicadas ao control e á inspección e que permitan detectar fraudes, incidindo particularmente no ámbito das subvencións e bolsas, tal e como se aprobou tamén nunha resolución do Debate de Estado da Autonomía.

4. O establecemento de mecanismos de control da legalidade e de seguridade xurídica no eido local, que se tratará de acordar coa Fegamp.

“Estes son algúns dos eixos que se inclúen no Programa que estudaremos o xoves”, insistiu, logo de referirse ao eixo de maior transcendencia:

5. A nova Lei de transparencia e do bo goberno: elaborar un texto novo, unha lei que permita avanzar máis e ser aínda máis esixentes.

- Unha lei participada por todos: para acadar a elaboración dun anteproxecto de lei o máis consensuado posible para a súa posterior tramitación parlamentaria abrirase un foro de participación cidadá sobre o novo texto. O obxectivo é que en marzo poida comezar esa tramitación do Anteproxecto de Lei de transparencia.

- Esta lei deberá: establecer as definicións en materia de transparencia; establecer a obriga de subministrar información por parte das persoas da Administración, pero tamén as entidades que contraten coa Administración e as que reciban subvencións; regular o dereito de acceso á información pública; ou definir cal vai ser o Órgano de control e seguimento da transparencia, que será un órgano autonómico e independente.

- Tamén deberá establecer normas de bo goberno, con medidas como:

Establecemento, por primeira vez, de límites da actuación dos gobernos en funcións. Un goberno en funcións non poderá, en consecuencia, nin presentar proxectos de Lei, nin autorizar convenios ou acordos co Estado e outras CCAA, nin aprobar convocatorias de provisión de postos de traballo, nin modificar RPT, nin adquirir compromisos de gasto fóra do gasto corrente.

Regulación do traspaso de poderes, coa obriga de deixar un informe de xestión no que quede constancia dunha serie de contidos mínimos (convenios vixentes, execución orzamentaria, compromisos asumidos, accións xudiciais nas que se sexa parte, contratos vixentes, obrigas pendentes de pagamento...).

Consolidación por lei de que exista un Código Ético Institucional que obrigue os altos cargos e que teñan que asumir no momento da súa toma de posesión.

E, ademais, respecto ás medidas reguladoras do alto cargo recolleranse e ampliaranse algunhas das que xa se aplican na Administración Xeral do Estado, para garantir o máximo control cidadán do desempeño dos altos cargos.

• Haberá un control da actividade dos altos cargos antes de acceder ao Goberno. Estará obrigado a inhibirse sobre asuntos que afecten a empresas nas que ocupase postos directivos nos dous anos previos ao seu nomeamento. Pero ademais, esa actividade nos dous anos previos deberá constar na súa declaración de actividades pública, para que a cidadanía teña constancia das vinculacións de todos os cargos públicos.

• Haberá maior control da súa actividade durante o exercicio do alto cargo, pois se prohibirá tamén a participación maior ao 10% non só en empresas contratistas da Administración senón tamén en subcontratistas.

• E tamén unha maior supervisión da súa actividade despois da súa saída. Para iso designarase a un órgano encargado de revisar as variacións do seu patrimonio para que sexan xustificadas. E ademais, establecerase a obriga de que, durante os dous anos nos que lle afecte a Lei de incompatibilidades, teña que declarar á Oficina de Incompatibilidades, con carácter previo, calquera actividade que pretenda emprender. Esta Oficina certificará se se cumpre ou non coas normas de incompatibilidade.

Esta lei tamén deberá regular o Portal Web de Transparencia, de xeito que se garantan os principios básicos de accesibilidade, interoperabilidade, calidade e reutilización da información publicada. No tocante a este portal, Feijóo subliñou que:

- Aumentarase a transparencia da Administración institucional: obrigarase legalmente a ter publicado na web o inventario total de entes, as retribucións do seu persoal directivo e os contidos dos seus contratos-programa e plans de actuación.

- Aumentarase a transparencia da acción lexislativa do Goberno: obrigarase legalmente a publicar no Portal de Transparencia o programa lexislativo do Goberno para que os administrados poidan prever os futuros cambios normativos e publicaranse tamén os textos das resolucións xudiciais que afecten á vixencia ou á interpretación das normas vixentes.

- Aumentarase a transparencia dos servizos públicos: obrigarase por lei a publicar todos os pregos de condicións das concesións de servizos públicos que faga a Xunta.

- Aumentarase a transparencia do empregado público: obrigarase legalmente a publicar no Portal de Transparencia o cadro total de empregados públicos e a súa distribución por grupos; os acordos reguladores das condicións de traballo e os convenios colectivos; as ofertas públicas de emprego e os procesos de selección do persoal e o os liberados sindicais e os seus custos.

- Aumentarase a transparencia do patrimonio da C.A: obrigarase por lei a publicar a relación de bens inmobles e de vehículos oficiais do sector público autonómico.

- Aumentarase a transparencia das contas públicas: obrigarase por lei a publicar toda a información sobre a débeda pública: a súa evolución, os indicadores estatísticos.

- Aumentarase a transparencia da actividade urbanística: obrigarase por lei a que no Portal de Transparencia estean á disposición da cidadanía todos os plans xerais de ordenación municipal e as súas modificacións e revisións.

- Aumentarase a transparencia da actividade contractual e convencional da Xunta. Co compromiso de que esta nova Lei de transparencia inclúa a renovación do decreto do rexistro de convenios para aumentar as posibilidades de consulta cidadá e regular as novas funcionalidades tecnolóxicas.

2. Control externo: nova Lei do Consello de Contas

O presidente do Goberno autonómico resaltou que a existencia dunha maior demanda social de transparencia e control sobre o manexo dos fondos públicos aconsella unha actualización da xa antiga norma reguladora do Consello de Contas para reforzar ese organismo. “Dotalo de novas funcións en materia de control e auditoría das contas, así como de prevención da corrupción, tal como comprometemos no DEA”, lembrou.

Con este obxectivo presentarase unha Proposición de Lei do Consello de Conta que contemplará aspectos como:

A atribución de facultades de prevención da corrupción, creando no seu seo unha sección encargada de: elaborar plans de riscos de prevención da corrupción; colaborar coas administracións galegas na elaboración de normas internas sobre prevencións deses riscos; e asesorar ao Parlamento, ao sector público autonómico a ás entidades locais galegas en materia de prevención da corrupción.

A potenciación da realización de auditorías operativas

Aberto ao diálogo, Feijóo expresou a súa confianza en que, “entre todos, poidamos ter a nova Lei aprobada neste primeiro período de sesións deste 2015”.

3. Participación cidadá e financiamento dos partidos

Por último, Feijóo fixo mención tamén aos aspectos vinculados á participación da cidadanía na política nunha dobre vertente: a da participación a través dos partidos políticos; e a da participación directa a través de novas vías para o acceso á información e á elaboración de propostas no Parlamento.

No eido da participación a través dos partidos políticos destacou unha nova Lei de financiamento dos partidos políticos no ámbito da Comunidade Autónoma de Galicia. Un texto que entre outras cousas deberá recoller: a prohibición de doazóns aos partidos por parte de persoas xurídicas; e o establecemento de medidas de transparencia adicionais ás previstas na normativa básica estatal.

Logo de solicitar ao Consello Consultivo a elaboración dun texto que servise como Anteproxecto de Lei de financiamento dos partidos políticos no ámbito da Comunidade Autónoma de Galicia, o titular da Xunta expresou o seu convencemento de que “nos próximos días recibiremos ese texto e, a partir de aí, comezar a súa tramitación para ser aprobado o correspondente proxecto de lei por parte do Consello da Xunta e, con posterioridade, ser enviado a este Parlamento no período de sesións que vai comezar”.

No eido de ofrecer vías de participación cidadá, tanto na actividade lexislativa, como na de impulso e control das administracións, Feijóo lembrou a aprobación na Cámara dunha nova norma para a regulación das iniciativas lexislativas populares, “e queremos seguir avanzando nesta idea”, aseverou.

Nesta liña, considerou que é oportuno contar cunha norma que permita regular as diferentes vías de participación na actividade parlamentaria, tanto as agora existentes, como outras novas que se poidan incorporar. E avanzou a presentación dun texto que permita regular:

• tanto as iniciativas lexislativas populares,
• como a posibilidade de presentar proposicións non de lei por parte dos cidadáns.
• ou a posibilidade de que a cidadanía poida realizar preguntas dirixidas ao Goberno que os grupos poderán asumir para a súa tramitación

Ademais, ese texto incorporará unha regulación que poida dotar de maiores garantías de control e sirva para impulsar e iniciativas xa existentes como “Lexisla con nós”. Unha medida impulsada desde a Presidencia do Parlamento, e que permite que as achegas que os particulares realizan durante a tramitación de proxectos lexislativos sexan coñecidas e valoradas nas correspondentes ponencias.

“En resumo, estamos a falar de máis control interno nos gobernos; máis control externo por parte do Consello de Contas; e mellor regulación da participación cidadá directa e mellores garantías no financiamento dos partidos”, concluíu, logo de incidir en que “máis aló das palabras, esta Xunta está respondendo e ten respondido con feitos” desde 2009.

I. Feitos no ámbito da ética e a honorabilidade dos altos cargos e o persoal da Administración Autonómica:

1. Decisión de facer públicas as declaracións de bens patrimoniais dos membros da Xunta. Unha práctica que foi posteriormente blindada con rango de lei. O presidente Feijóo foi o primeiro presidente da Xunta que fixo públicas as súas declaracións do IRPF.

2. Aprobación dos criterios básicos para regular, por primeira vez na Autonomía galega, as viaxes oficiais ao exterior dos cargos da Administración autonómica.

3. Homologación e publicación das retribucións do persoal directivo dos entes instrumentais do sector público autonómico, establecéndose topes máximos segundo o tipo de organismo.

4. Aprobación do primeiro Código ético Institucional da Xunta de Galicia, un manual que regula e condensa nun único documento os criterios básicos de conduta e responsabilidade profesional no ámbito da administración autonómica galega.

II. Feitos no eido da eficiencia e calidade dos servizos da Administración:

5. Redución do 50% do número de altos cargos; redución do persoal eventual; redución de coches oficiais e menor gasto corrente.

6. Lei de garantía da calidade dos servizos públicos (en tramitación na Cámara).

7. Posta en marcha de tres plans para avaliar, reestruturar e optimizar o funcionamento da Administración instrumental dependente da Xunta de Galicia: con medidas de axuste, de supresión ou mellora do funcionamento, sobre 160 entes dependentes.

III. Feitos no eido da contratación:

8. Lei de racionalización do sector público, coa que se rebaixou á metade as contías de adxudicación directa para contratos menores.

9. Garántese que procedementos negociados iniciados pola Xunta sexan os máis transparentes das administracións públicas españolas, de xeito que as empresas poidan coñecer as ofertas das competidoras para acadar mellores prezos antes da adxudicación definitiva.

10. Sistema de factura electrónica.

11. Regulación da Plataforma de Contratos Públicos de Galicia.

IV. Feitos no eido da transparencia e do acceso á información e á participación da cidadanía:

12. Faise máis accesible a Guía de Procedementos e Servizos.

13. Implementación da iniciativa Open Data da Xunta de Galicia.

Nota de prensa del Gabinete de Comunicación del PSdeG:

José Luis Méndez Romeu sinala que as propostas presentadas polo presidente da Xunta “son falsas ou son mentira” e advirte que “non está lexitimado para dar leccións”.

Reclámalle que explique a “presunta financiación irregular” do PP galego e a súa implicación nos casos de corrupción investigados pola xustiza.

O portavoz do Grupo Socialista, José Luis Méndez Romeu, advertiu a “falla de compromisos firmes” de Feijóo contra a corrupción. Así o dixo na comparecencia do presidente da Xunta sobre corrupción que tivo lugar hoxe no Pleno do Parlamento, e na que lle lembrou que ata o momento “as súas propostas son falsas ou son mentira”.

O responsable socialista advertiu que o presidente da Xunta “non está lexitimado para dar leccións” sobre corrupción mentres se negue a explicar o presunto financiamento irregular do PP galego. Reclamoulle que “si quere un compromiso firme debe optar pola exemplaridade” na súa actuación á fronte do goberno galego, con “mais feitos e menos verbas”.

Así, lembrou que continúa sen explicar a situación do ex secretario de Organización do PP galego, Pablo Crespo, para quen o fiscal solicita 42 anos de cárcere. Criticou que Feijóo evitou dar conta da implicación do seu partido na trama Gürtel, o financiamento da sede de Pontevedra, o financiamento do seu partido en Ourense, a Operación Zeta ou as “amizades perigosas” con presuntos conseguidores de contratos irregulares.

Méndez Romeu lembrou que “a súa responsabilidade é grande” e reclamoulle ao presidente da Xunta que “remate coa persecución xudicial de cargos políticos, coa captación discutible de alcaldes, integrar e impulsar unha ética pública que acabe con estas actitudes tan pouco presentables”.

O responsable socialista puntualizou que parte do “catálogo de medidas” presentado por Feijóo fora rexeitado polo PP no debate do Estado da Autonomía cando as presentou o Grupo Socialista. Ao mesmo tempo, as propostas presentadas polo PP, apoiadas polos socialistas galegos, permanecen dende entón sen desenvolver.

Méndez Romeu sinala que esta situación evidencia que o presidente da Xunta presenta as súas propostas co único obxectivo de “reiteralas para logo non aplicalas”, demostrando sobradamente o incumprimento dos acordos parlamentarios. Reclamoulle así que abra a porta á participación dos demais partidos políticos para acordar unha “ética pública compartida e baseada na exemplaridade”.

O portavoz socialista desacreditou a actuación do PP, que contradí os seus anuncios negándose a endurecer a “porta xiratoria” a través do Estatuto do Alto Cargo, ou rexeita modificar a Lei de contratos do sector público cando o 47 por cento dos contratos da Xunta en 2014 foron asinados sen libre concorrencia.

Méndez Romeu reclamou “ética e estética” mentres a Xunta agocha as cláusulas do contrato co hospital privado Povisa, ao que entregou 726 millóns de euros a través dun contrato negociado sen publicidade. Criticou que Feijóo teña proposto encetar unha reforma da Lei Electoral retirada polo Estado.

O responsable socialista advertiu ademais que mentres Feijóo propón que o Consello de Contas “se ocupe da corrupción”, escolle como conselleiros a “persoeiros recoñecidos do PP” e rexeita as emendas socialistas para incrementar os orzamentos do ente fiscalizador ou ampliar as súas funcións.

Nota do Gabinete de Comunicación de AGE:

Para Xosé Manuel Beiras, “a corrupción comeza pola violación sistemática da Constitución que o Partido Popular practica”. Con esta idea recibiu o portavoz de Alternativa Galega de Esquerda (AGE) a comparecencia propagandística de Alberto Núñez Feijóo no Parlamento de Galicia a respecto dun presunto impulso democrático contra a corrupción. “Vostede volveu demostrar que é indigno de ser presidente da Xunta e que toma de chirigota esta Cámara”, afeoulle Beiras, “porque vostede non falou para nada de impulso democrático, senón de corrupción. E cando a corrupción alcanza estes niveis, convértese en sistema de poder”.

Contra a amnesia dun Núñez Feijóo que, nunha intervención de cinismo sen límites, reduciu o carácter estrutural da corrupción –especialmente aguda no PP- a “algo persoal”. Nin o ex tesoureiro do seu partido, cabeza dunha trama de financiamento ilegal que afecta á dereita de Feijó en todo o Estado, nin as múltiples operacións policiais en marcha que afectan directamente a altos cargos desa formación –as tramas Patos, Pokemon ou Zeta-, nin as prácticas investigadas dos presidentes das deputacións de Ourense ou Pontevedra, nin o nepotismo confeso da conselleira liquidadora da sanidade pública e universal, parecen abondarlle ao presidente da Xunta. “A corrupción é cuestión dunha auténtica mafia que parasita un partido enteiro”, afirmou Beiras, “e así consta en documentos xudiciais a respecto da Gürtel”.

O portavoz de AGE cualificou os anuncios propagandísticos de Feijóo de “lapso freudiano”. “Revela que saben que non van gobernar máis”, expuxo, “e queren someter aos que veñan aos controis que vostedes evitaron”. Foi antes de entrar a fondo na “violación sistemática da Constitución” ou de como o Partido Popular dá a volta ao seu programa electoral nada máis chegar ao Goberno.

Beiras mencionou varios artigos da Constitución que os executivos do PP desprezan, deconstrúen, negan, atacan ou esquecen. Só no capítulo 3, o artigo 39.1 di que os poderes públicos aseguran a posición social e económica das familias. O 41, fala de que os poderes públicos garantan o progreso económico e social a través dunha política de pleno emprego. O 43.1 refírese ao dereito á protección da saúde pública. O 47, a unha vivenda digna e axeitada. O 49, á defensa das persoas con discapacidade.

“Vostedes abrogaron a Constitución, e cometen crimes contra a xente”, asegurou o líder de Alternativa Galega de Esquerda, “e se todo isto está violado, ¿a que veñen agora falar de impulso democrático? O que teñen que facer é cumprir a Constitución que violan sistematicamente e que, paradoxalmente, nós, que non a votamos por insuficiente, temos que defendela”.

Gabinete de Comunicación do BNG:

O portavoz do G.Parlamentario do BNG, Francisco Jorquera censurou a intervención de Feijóo da que dixo pasou de “puntillas” sobre os asuntos máis espiñentos de corrupción que salpican ao Partido popular en Galiza e ao seu goberno. “Vai acabar comparecendo a través dunha pantalla de plasma” despois de utilizar o Parlamento como “un plató de televisión”.

Na súa intervención, o portavoz nacionalista anunciou que, a pesar do veto do PP que impediu presentar propostas aos grupos parlamentarios, o BNG faría entrega a Feijóo de seis medidas para a rexeneración democrática e loitar contra a corrupción.

Baixo os epígrafes: Protección da representación pública da influencia dos grupos de presión, protexer as políticas e os servizos públicos, persecución efectiva dos delitos de corrupción, impulsar a transparencia ou aprobar o ditame da comisión non permanente contra a corrupción con medidas efectivas no plano político, institucional e normativo foron algunhas das achegas do BNG nunha sesión plenaria na que Feijóo non aludiu a ampla lista de imputados do Partido popular.
Feijóo responde a Jorquera

Feijóo responde a Jorquera

“Vostede sacrificou a cabeza do director de Sogama para que non interferise neste debate” o mesmo que fixo Rajoy con Ana Mato pero non actúan con “contundencia” ante os verdadeiros casos que afectan ao PP, recalcou.

Para o portavoz parlamentario do BNG , hoxe Feijóo tampouco deu explicacións das “súas amizades perigosas” con Marcial Dorado ou Pachi Lucas, polo que volveu preguntar que significa para Feijóo a transparencia e o impulso democrático,vetar a comisión de investigación sobre os cursos de formación?, utilizar o Parlamento de teatro para o seu “lavado de cara”?, paralizar a comisión de medidas contra a corrupción?. As súas propostas, afirmou, “son fume” e hai un refrán que di que “non se pode poñer ao raposo ao coidar o galiñeiro”.

Corrupción, insistiu é desamortizar o patrimonio público entregándollo aos Lobys privados, que o señor Juncker negocie “ás agachadas” coas multinacionais para que usen Luxemburgo como paraíso fiscal, que Bárcenas estea na rúa mentres vostedes instauran a cadea perpetua revisábel ou lexislar a favor das eléctricas cando a xente non ten para pagar a luz, para despois sentar nos seus consellos de administración a destacados responsábeis do Goberno.

Corrupción, tamén é que grandes empresas financien a algún partido a cambios de que estes gobernen por elas facendo de correa de transmisión dos intereses das elites económicas. Para rematar con esta lacra é necesario un cambio e nesa liña, van as propostas do BNG.3

Está disposto preguntou Jorquera novamente a Feijóo a reverter a xestión privatizada dos servizos dependentes da Xunta, a rescatar a concesión da autovía da Costa da Morte? Porque esas son as prácticas coas que hai que acabar.

Esta disposto a acabar coas portas xiratorias? a reclamar endurecer o castigo penal para os casos de corrupción, impedir os indultos, agás por motivo de urxencia humanitaria, a independencia, publicidade e transparencia nas axudas a medios de comunicación privados, asegurar o cumprimento da Lei de transparencia, a celebrar consultas populares ou renunciar a modificar da lei electoral no seu beneficio, sí ou non?, concluíu Francisco Jorquera.